أرابيسك

(هذه القصيدة ، هي التي كنت قد تحدثت عنها في التدوينة السابقة )

(1)
البهلوان

أنا كنت أصلا ً بهلوان
بأرقص و باطلع ع الحيطان
بأضحك و ضحكي بيملا كل الكون فرح
لحد ما الغول الكبير .. و الغيلان
نهبوا البلد .. باعوا البلد
و لبسوا الشعب الطرح
من يومها و أنا ضحكي اختفى
و خدت ميت مليون قفى
و شعري شاب قبل الأوان
و بلادي صارت سيرك ..
من غير بهلوان

(2)
رسام

قالوا عليه رسام
كان يختفي ..
يطلع على سطوح البيوت
و يرسم الشمس الجميلة
قبل ما تروح تختفي
كانت ودانه تسمع اللحن الجميل
و تلقطه من ألف ميل
و ترسمه عيونه ف خياله
***
و ف يوم و هو معدي .. جنب قصر الملك
سمعله لحن غريب .. كئيب
رسمت عيونه اللحن زي الكابوس
شاف فيه حمام .. و شاف ظلام
شاف الحمام بينقتل
و الظلام بيزيد ظلام
شاف فيه وحوش ..
و غيلان بتاكل ف البشر و الجاموس
فاق الولد م الحلم زي المريض
مسك الولد سيخ حديد ..
و خرم ودانه
مسك الولد سكين ..
و بحرفها .. قلع عيونه
فاق الولد من جنونه
لقى نفسه مش سامع .. غير اللحن الكئيب
لقى نفسه مش شايف .. غير الظلام
و الظلام بيزيد ظلام

(3)
باليرينا

لما بترقص
بتحاول تنسى الدنيا من حواليها
بتعيش ف خيالها
بتعيش اللحظه بكل ما فيها
بتطير و تحلق فوق ف السما
و ف لحظه بترجع تاني للأرض
و بترجع لحياتها المره
***
كانت طفلة بريئة
عاشت طفولتها بالطول و العرض
كبرت .. و بقت بنت رقيقة
نقطتها السودا
إنها كانت بنت الغول !
كرهت حالها
و اتعلمت ازاي تنساه بالفن
و مع الوقت
شعورها عدا حدود الكره
و بقت لما بترقص
بتسيب جزء منها .. يروح للفن
اتخلت عن ضحكتها الحلوه
اتخلت عن فرحتها
و اتخلت حتى عن الحزن
نسيت معنى الخوف و الجبن
نسيت معنى الحيرة
و معنى الغيرة
و اتبقى لها .. رقصة أخيرة
***
احساسها المرة دي .. كان بزيادة
و قفت على طراطيف صوابعها
زي العادة
بدأت تدور و تدور
و تدوب ف النور
تميل يمين .. وتميل شمال
بدأت تتوحد .. مع لحن البيانو
تاخد من كيانها
و تحط ف كيانه
سابت دنيتها
عاشت ف الخيال
دابت ف اللحن .. دابت ف الجمال
و اتبخرت ..


(4)
الغول

الغول عينيه حمرا
و شعره طويل
الغول سنانه كبيرة زي السيوف
الغول بينفخ نار .. و خوف
بيبخ سمه ف الوشوش
يسحب فريسته للكهوف
و يقوم راميها للوحوش
***
الغول عمره ما كان كده
الغول بيقعد ف المكاتب
الغول وزير
الغول ده نائب
و يمكن أكبر من كده
الغول بشر
قلبه حجر
لكن بينبض بالحياه
الغول بياكل ف النفوس
لكن بظلمه و نهبه .. وبالنفوذ
و ساعات كتيره بالفلوس
***
يمكن تقوللي :
لما انت عارف كل ده
انت فين من ده و ده
أرد أقول :
كتروا الغيلان
و ما عادش في ذرة أمان
أنا كنت أصلا ً بهلوان
الغول قتلني من زمان

(5)
أرابيسك

حارتنا فيها شباك قديم
مصنوعة ضرفه من الأرابيسك
و ف الأرابيسك
حته بتضحك زي الأراجوز
و حته بتحلم زي الرسام
و حته بترقص .. وتأثر فينا
زي الباليرينا
***
و ف يوم هبت ريح ع الحارة
ريح سعرانه
زي الغول ..
جريوا الناس .. هنا و هناك
وقع الشباك ..
و اتبقى الغول .. و الأرابيسك